«Попыт на драўляныя дамакамплекты ад лясгасаў з пачатку года вырас больш чым у чатыры разы», — паведамілі ў прэс-службе Мінлясгаса. Гучыць пераканаўча — калі не глядзець на канкрэтныя лічбы.
— Калі за ўвесь мінулы год мы рэалізавалі фізічным асобам 10 дамакамплектаў, то за пяць месяцаў гэтага года — ужо 16 дамакамплектаў. Яшчэ 27 дамакамплектаў цяпер знаходзяцца ў стадыі вырабу, то-бок пакупнікі заключылі дамовы і ўнеслі перадаплату, — расказаў намеснік міністра лясной гаспадаркі Уладзімір Крэч падчас вытворчай нарады ў Любанскім раёне.
Паводле яго, «беларусы таксама актыўна набываюць альтанкі і лазні». Агучаныя ім лічбы: 16 альтанак і шэсць лазняў з пачатку года.
Нагадаем, у сярэдзіне сакавіка Мінлясгас прадэманстраваў прэм’ер-міністру Раману Галоўчанку драўляныя дамкі ад беларускіх лясгасаў. У верасні ў лясгасах пачалася серыйная вытворчасць драўляных дамоў пад ключ, а міністэрства адкрыла восем гандлёвых пунктаў па іх продажы. Пакупнікам прапануюць пяць варыянтаў дамоў коштам ад 18 да 70 тысяч рублёў.